Apple shtyn porositë e iPhone Air në Kinë për shkak të problemeve me eSIM
Apple ka pezulluar porositë paraprake për modelin më të ri dhe më të hollë të saj, iPhone Air, në tregun kinez, duke përmendur probleme të lidhura me rregullat e përdorimit të eSIM.
Në faqen zyrtare të dyqanit online në Kinë, për iPhone Air shfaqet njoftimi se “informacioni i lëshimit do të përditësohet më vonë”, duke e shtyrë kështu kohën e daljes së tij në treg. Fillimisht, kompania kishte njoftuar se modeli do të hapej për porosi paraprake në të njëjtën kohë si në SHBA, me shpërndarje nga data 19 shtator.
Ndërkohë, tre modelet e tjera – iPhone 17, 17 Pro dhe 17 Pro Max – janë të disponueshme për porosi në Kinë dhe do të nisin dërgesat që nga java e ardhshme.
Arsyeja kryesore e vonesës lidhet me faktin që iPhone Air është telefoni i parë i Apple i projektuar vetëm me eSIM, pa hapësirë për kartë SIM fizike. Ky standard ende nuk është i përhapur në Kinën kontinentale, ku pajisjet lokale vazhdojnë të mbështeten në kartat SIM tradicionale. Deri më sot, asnjë nga modelet e mëparshme të iPhone nuk ka ofruar mbështetje për eSIM në tregun kinez, përfshirë edhe serinë e re iPhone 17.
Ky hap i Apple nënvizon vështirësitë e kompanisë për të harmonizuar risitë teknologjike me rregulloret lokale, veçanërisht në një nga tregjet më të mëdha dhe më strategjike për shitjet globale të saj.
